100 
CORRESPONDANCE 
chemin d’Allemagne ; je ne sçay s’il s’y arrestera, ou s’il pas- 
sera droit à Sedan ; il a tiré de la chambre de Castres, devant 
que de partir de ladite ville, l’arrest duquel je vous envoyé 
ung double. S’il veult se servir d’iceluy pour prouver et faire 
croire s’estre mis en bon debvoir de se justifier, et qu’il ne luy 
a esté permis de le faire, il agravera sa faulte et son offense ; 
car il n’a deu s’adresser à la dite chambre sans ma permis- 
sion , ni fuir ma présence, et désobéir à mes commandemens, 
estant mon subject et officier de ma couronne, mesmement 
s’il se sent innocent. J’avois envoyé vers luy, comme je vous 
ay escript, ung de mes conseillers, pour luy remonstrer sa 
faulte et luy commander de rechef de me venir trouver; mais 
il ne l’aura trouvé. Je verray maintenant comment il se com- 
portera où il s’est retiré. Cependant je vous prie de croire 
que je ne permettray qu’il soit faict chose en ceste affaire des- 
rogeante à ma justice et clémence ordinaire, esprouvée par 
tous ceux qui ont eu besoing de l’une et de l’autre. 
Je prie Dieu, mon cousin, qu’il vous ayt en sa très sainte 
et digne garde. 
Escript à Paris, le xii  e jour de janvier 1603. 
Henry.